Revelation of John 2
Vaikala Ane 'o Ulai Noxi'a ta Epeso
1 a “Nini nakaukavu vaivaikala ane 'o ulai noxou angelo noxi'a ta mitema noxou Lataua ne Epeso. Itema e utetelisi'a ta oto muxatele tamei no avolu tema xe umuamua'i no taiinu mii sou itulusou telu xoulu no anu muxatele tamei ane mulamilami ne, uvikala aloxo 'o, 2 b‘Eni elavusou 'ili'ilixomengi mo xaixai tatila e ngingi nge'oxonu. Mo eni elavu lexe ngingi ngatulu pekia'inge no anu tu'utu'umaxu mo ngingi ngamomomo sou ngatulu noxi'a ta mitema ta masua la uasi. Mo eni elavusou lexe ngingi ngetovone'i ane'i ane mikalavoingengi lexe ane'i ta mitema noxou Iesu sou upalupalusi'a la ngelavusi'a lexe ane'i ta mitema sou kalakalavoisi. 3Mo ngingi ngetulu pekia'inge mo ngexolu se'isisi no anu tu'utu'umaxu xo ngingi ngemulileli no ualasilo ia ngingi ngatotosa uasi.4Ia eni akalapuusinge. Xo ngingi tei la ngemasaxailo, ia vaimomo 'o la ngamasaxailo uasi. 5 cLa sou ngingi ngaxavutalanu 'ilixo laixe ngingi ngemulinu tei. Ia vaimomo 'o ngingi ngelapau! La sou ngingi ngaxiu mo ngamulinu 'ili'ilixo ane ngingi nge'oxo'oxo tei sou ngamasaxailo. Lexe ngingi ngaxiu uasi, la eni ane'e axexeenu mii sou itulusou telu no anu noxinge no tanixu ne asukunu ulai va'axu. 6Ia eni a'iti ualasinge, xo ngingi ngamasaxau 'ili'ilixo noxi'a ane'i ane mimulinu xavutala noxou Nikolasi uasi manina aloxo eni kalumo.’
7 d'Ei ane sangalou, la ulomusou vaikala ane Uleenu Tavuna muvikalane'i ta mitema noxou Lataua no anu laixe. Xe anu ane ualulixu 'oto'oto, la eni apelemasaxanu sou u'ou ovu sou mauli ngiaxu. Ovu ne, mutulu no nano no tuala laixe noxou Lataua.”
Vaikala Ane 'o Ulai Noxi'a ta Sumuna
8“Nini nakaukavu vaivaikala ane 'o ulai noxou angelo noxi'a ta mitema ne Sumuna. Itema e soko'u mo kaluxu xe musoli ia mumauli la ne, Anu uvikala aloxo 'o, 9 e‘Eni elavusou lexe ngingi ngaxamulinu navunavu mo mengi mimii uasi, ia noxou Iesu Kalisito la ngingi mengi mimii tavu'alo. Mo eni elavu lexe ta mitema ane ane'i ikalavoi lexe ane'i ta Iutaia ne, ivikala masuasinge. Ia ane'i ta Iutaia manina uasi, ane'i ta mitema noxou Satani. 10 fIa mamu sou nga'ume no anu navunavu e 'ala'alai sou ngingi ngaxalisou. Eni avikalangengi lexe itema masua anu Satani umulaxa'a se'i noxinge no nano no taasou navunavu sou utovongengi mo ngingi ngaxolu no anu navunavu ane ne voxo mavulovexa. Ia ngingi ngatulu pekia'inge ulai utalo no voxo ane ngingi ngasoli, la eni alosinge mauli ane kaluxu uasi loxo eni alosou itema e muuli no anu saisale kisivalu.’11 g'Ei ane sangalou, la ulomusou vaikala ane Uleenu Tavuna muvika-lane'i ta mitema noxou Lataua no anu laixe. Xe anu ane uaulixu 'oto'oto, la anu umomomo sou uulua no anu soli tameisou uasi.”
Vaikala Ane 'o Ulai Noxi'a ta Peluxamo.
12“Nini nakaukavu vaivaikala ane 'o ulai noxou angelo noxi'a ta mitema ne Peluxamo. Itema e utetelisou laviso anaxu tamei ia laviso ne anaxu misevile ne, uvikala aloxo 'o, 13‘Eni elavusou lexe ngingi ngaxoxolu no tani ane ne Satani musaxila'u. Ia ngingi ngamulimulileli kalumo. Xe no voxo ane ta mitema no tualasinge e Satani muxolu no anu ne mivau Antipasi sou musoli, la ngingi ngaxiu tumalingeilo uasi. Io anu ne, anu mu'oxonu xaixai laixe sou mua'aloxu ualasilo.14 hIa eni akalapuusinge no anu mimii mose'i, xo ta mitema se'i no taiingengi ne mimulinu vaivaikala e Balamu mulosie'ixu. Tatei, la anu mulosiouxu Balaki sou mu'oxone'i ta Isilaeli sou misusu la mi'ou la'ilali e milosi'a ta Maliava sou kalakalavoi. Xe mi'oxonu 'ili'ilixo masumasua sou vote'i. 15Aloxo ta mitema mose'i no taiingengi kalumo mimulinu vaivaikala e Nikolasi mulosie'ixu. 16La sou ngaxiu. Ia lexe ngingi ngaxiu uasi, la eni 'ala'alai sou alivu ane'e noxinge. Ane'e la a'otoxa'a no anu laviso no anaxo.’
17 i'Ei ane sangalou, la ulomusou vaikala ane Uleenu Tavuna muvika-lane'i ta mitema noxou Lataua no anu laixe. Xe anu ane ualulixu 'oto'oto, la eni aitiu la'ilali ilemo lexe mana e mitalumeu. Mo eni alosou lavo'o kea vile. No anu lavo'o kea ne, la mikau-kavunu uala vile alavua no anu, ia anu ane uno'u lavo'o ane nesi ulavusou.”
Vaivaikala Ane 'o Ulai Noxi'a ta Tiatila
18 j “Nini nakaukavu vaivaikala ane 'o ulai noxou angelo noxi'a ta mitema noxou Lataua ne Tiatila. Lataua 'Olu e iou loxo navu lamixu xe tava'u loxo barasi ulamilami ne, uvikala aloxo 'o, 19‘Eni elavusou 'ili'ilixomengi mo 'ilixo sou ngemasaxau Kalisito mo muxamuxaxu tangengi noxou mo xaixai e ngingi nga'oxo'oxonu ulai noxi'a ta menexinge mo elavu lexe ngingi ngetulu pekia'inge no anu tu'utu'umaxu. Mo elavu lexe 'ili'ilixo e ngingi nga'oxo'oxonu ne muaulixu 'ilixo ane ngingi nge'oxo tei.20 kIa eni akalapuusinge, xo ngingi iengi muvaxaie sema to ne ualasie lexe Iseveli. Ane mele milemele lexe ane sema palomatana vile. Ane milosie'ixa'a ta mitema sou xaixai noxilo vitanisi sou mi'oxonu 'ili'ilixo masumasua sou vote'i mo mi'ou la'ilali ane milosi'a ta Maliava sou kalakalavoi. 21Eni elosie voxo mose'i sou lexe ixiu no anu 'ili'ilixoie sou vote'i ne, ai ane imasaxa uasi. 22La sou eni alosie pipiena mo ixamuli navunavu tatila mo iailixu no luusie. Mo eni alosi'a ane'i ane mitaula'i ia milai noxie navunavu toxoxa'a lexe ane'i ixiu tumali'au 'ili'ilixo noxie uasi. 23 lMo eni ave'ave'a ane'i ane mimulimuline isoisoli. La sou ta mitema noxou Lataua ukalusi ne, ilavu lexe eni elavusou manina ta mitema tane'i ilou xavutalai'a mo eni akoli ulai noxinge no anu mii ma'ia ngingi vilevilesi nga'oxonu. 24Ia eni avikalangengi ngingi ta mitema pa'usou ne Tiatila e ngingi ngamulinu vaivaikalaie mo ngalavusou mii noxou Satani ane mutalume uasi. Eni amomomo sou alosinge tu'utu'umaxu se'i uasi. 25 mIa ngatetelisou mii ma'ia ane ngingi ngeno'u ulai utalo no mine eni alivu ane'e.’
26 n'Ei ane uuaulixu 'oto'oto mo u'oxonu mii ma'ia ane eni emasaxau ulai utalo no anu voxo ane anu usoli ne, la eni alosou xavi sou usaxila'a ta mitema no xalexalee tuatuala ukalusi.
27‘Anu usaxila'a no anu vilaxoxu aeni ane xaviinu musuku sou umamulone'i ta mitema loxo latotope ane mi'oxonu no anu lia utuxusi aloxo eni eno'u xavi noxou Mamilo. 28 oMo eni alosou xuae sou lamana ukea.’
29'Ei ane sangalou, la ulomusou vaikala ane Uleenu Tavuna muvikalane'i ta mitema noxou Lataua no anu laixe.”
Copyright information for
ATA